Conxuntu de técniques que nel audiovisual doten de movimientu a dibuxos, moñecos, oxetos y materiales de tou tipu, incluyendo tamién a los seres humanos.
Dalgunos de los pioneros de l’animación son James Stuart Blackton col curtiumetraxe de dibuxu animáu The Enchanted Drawing (1900), Segundo de Chomón qu’anima oxetos y actores en L’hotel eléctricu (1908) y Emile Cohl col filme de dibuxu animáu Fantasmagoríes (1908).
Una bona parte de la producción d’animación en dibuxu animáu y n’animación tridimensional ta lligada al xéneru del fantásticu blancu, como la maxa, lo sobrenatural o la tresformación psicolóxica o física nun ser meyor
Una bona parte de la producción d’animación en dibuxu animáu y n’animación tridimensional ta lligada al xéneru del fantásticu blancu (la maxa, lo sobrenatural, el poder del ser humanu, la tresformación psicolóxica o física nun ser meyor, el bien), por exemplu los productos de la factoría Disney como la historia del neñu volador que nun quier medrar, Peter Pan (1953) con dirección de Hamilton Luske, Clyde Geronimi y Wilfred Jackson, o de la compañía Pixar, como Up (2009) de Peter Docter, l’aventura na selva d’un vieyu viudu que quier cumplir una promesa fecha a la so esposa difunta. Otres llinies de trabayu son la producción d’animación empobinada a lo fantástico escuro (el poder destructivu del ser humanu, el mal), como delles pieces de Jan Svankmajer -Dimensiones del diálogu (Moznosti dialogu, 1983)- o dellos manga xaponeses; escontra estilos independientes, como les obres d’humor negro y poesía de Bill Plympton, como’l llargumetraxe Idiots and Angels (2008), o en direcciones vanguardistes, como les pieces Rhytmus (1923) de Hans Richtery, Sinfonía Diagonal (1924) de Viking Eggeling; o esperimentales, como los curtiumetraxes astractos Begone Dull Care (1949) de Norman McLaren o The Dante Quartet (1987) de Stan Brakhage.
Up
Up / Là-haut | PIXAR / Pete Docter, 2009, EE.XX.
Carl Fredricksen ye un vendedor de globos retiráu que, a los 78 años, decide romper con too y llanzase a realizar lo que cola so esposa difunta foi’l suañu de la so vida: viaxar en globu hasta les Catarates del Paraísu n’América del Sur. Acosáu polos especuladores y a puntu de ser recluyíu nun asilu, el misántropu Carl va convertir la so casa vieya nuna nave allucinante propulsada por cientos de globos y va abandonar aquella deshumanizada ciudá derrompiendo los cielos en busca del so particular “El Doráu”. Pero, en tando nel aire, va alcontrar la que podría ser la peor velea de so vida: embarcóse con él Russell, un “intrépidu” proyectu d’escultista de namás 8 años, increyiblemente inocente y torpón pero con un optimismu a prueba de bombes.
Tendemos a alcordanos más de les coses que nos provoquen emociones. Si un perru te mordió cuando teníes trés años, seguro que te vas alcordar tola vida. Pero ye posible que nun t’alcuerdes d’ónde dexasti les llaves del coche ayeri mesmo. Y yo quiero que’l públicu s’alcuerde pa siempre de les mios películes
Pixar
(1986)
Frutu de la collaboración feliz ente John Lasseter (como creativu principal), Ed Catmull (como xeniu de la inxeniería) y Steve Jobs (como visionariu entamador), la Pixar Animation Studios, más conocida como Pixar, ye güei la compañía d’animación más respetada del mundu. Con sede n’Emeryville, California, la empresa, tal como se conoz agora, foi fundada oficialmente en 1986, cuando Jobs, desencantáu pol camín que garrare Apple, la “marca” qu’él mesmu creara y qu’agora prescindía ensin más de los sos servicios, mercó-y a George Lucas por cinco millones de dólares una división informática pequeña perteneciente a la so toupoderosa Industrial Light & Magic. D’esi alcuerdu surdieron trés curtiumetraxes xeneraos dafechu por ordenador que camudaríen yá pa siempre’l rumbu de la industria: Luxo Jr (1986), col flexu pequeñu que se convirtió nel logo de la compañía, el murniu Rede’s Dream (1987), y l’oscarizáu Tin Toy (1988), aniciu vía Disney de la posterior Toy Story (1995), primer llargumetraxe de Pixar y primer película de la historia animada única y esclusivamente con tecnoloxía dixital. La cinta recaudó más de 361 millones de dólares en tol mundu, y convirtióse na punta de llanza d’un innovador modelu de producción, creatividá y desenvolvimientu tecnolóxicu nel que pudieron esplotar tol so talentu artistes entós emerxentes como Andrew Stanton, Pete Docter, Joe Ranft, Brad Bird o’l mesmu Lasseter. Dende entós, la compañía produció 17 películes exitoses (toes elles acompañaes pol so correspondiente, y xeneralmente oscarizáu, curtiu), ente les que destaquen finxos de l’animación contemporánea como Bichos (1998), Monstruos, S. A. (2001), Los Increíbles (2004), Ratatouille (2007), WALL-E (2008), Toy Story 3 (2010) o Al revés (Inside Out) (2015). En xineru del 2006, la empresa foi adquirida por 7.400 millones de dólares por The Walt Disney Company. Namás un mes primero, el 14 d’avientu del 2005, el MoMMA inagurare Pixar: 20 Years of Animation, la primer esposición esterna del trabayu orixinal del estudiu. A últimos del 2015, les películes de Pixar xeneraren yá más de 9.300 millones de dólares a nivel mundial, con un promediu de recaudación de 623 millones por película, consiguiendo en tou esi tiempu 16 premios Óscar, 8 Globos d’Oru y 11 premios Grammy. El 6 de setiembre del 2009, Lasseter, Bird, Docter, Stanton y Unkrich recibieron el Lleón d’Oru de Venecia en reconocimientu a tola so carrera, premiu honoríficu que-yos apurrió’l mesmu George Lucas.