Recursu narrativu pol que s’oi la voz d’un narrador o d’un personaxe que nun ta visualmente nel encuadre, o bien qu’anque tea nél nun diz les palabres que s’oyen na banda sonora, polo que se da a entender que vienen del so discursu mental.
Luis Buñuel fai dialogar a personaxes que nun mueven los llabios, esto ye, dende’l pensamientu y polo tanto en voz n’off en La edá d’Oru (L’Age d’Or, 1930), con guión de Buñuel y Salvador Dalí. Seis años más tarde, Sacha Guitry escribe y dirixe una película narrada en voz n’off, cuasimente ensin diálogos, Le roman d’un tricheur (1936).
La función de contrapuntu auditivu de les imáxenes de la voz n’off pue ayudar a intelectualizar el discursu narrativu o a conferir determinada dimensión poética
La voz n’off ye un recursu habitual de reportaxes y documentales, como’l mediumetraxe sobre’l funcionamientu del corréu nocturnu Night Mail (1936) de Harry Watt y Basil Wright. La función de contrapuntu auditivu de les imáxenes de la voz n’off pue ayudar a intelectualizar el discursu narrativu o a conferir determinada dimensión poética, tal como asocede n’Hiroshima mon amour (1959), nel que dos amigos de los malpenes se ven los sos cuerpos entellazaos dialoguen sobre l’amor y sobre los efectos de la bomba atómica, mentes s’asoceden les imáxenes documentales d’Hiroshima.
Hiroshima mon amour
Hiroshima, My Love / Hiroshima mon amour | Alain Resnais, 1959, Francia
Agostu de 1957, Hiroshima. N’acabando’l rodaxe d’una película sobre la paz, una actriz francesa moza (de la que nunca vamos llegar a conocer el nome) pasa la so última nueche na ciudá d’Hiroshima metida nun hotel y en compañía del so amigu ocasional, un xaponés qu’acaba de conocer y xunto al que va vivir una historia d’amor percurtia. Lo que podría ser namás una aventura fugaz va convertise, a la solombra siempre d’una ciudá marcada a fueu pola memoria del horror nuclear, nun idiliu intensu que va llevar a revivir la doliosa historia del so primer amor con un soldáu alemán na Francia ocupada.
Dixi que yera un filme realista porque asina ye como asocede nes nuestres cabeces; esa yera la idea
Alain Resnais
(1922-2014)
Director, guionista y montador galu, Resnais sería con François Truffaut y Jean-LucGodard ún de los principales representantes de la Nouvelle Vague francesa, movimientu al que nun pertenecería dafechu pero del que sería consideráu como ún de los sos más reconocibles pilares. Esteláu pol cine dende pequeñu, Resnais empezó la carrera como realizador dedicáu dafechu al cine documental, xéneru al qu’ayudó de manera realmente escepcional filmando un puñáu d’auténtiques obres maestres ente les que destaquen por derechu propiu curtiumetraxes como’l so oscarizáu Van Gogh (1948), Les estatues tamién muerren (1953), Nueche y nublina (1955) o Tola memoria del mundu (1956). Depués de trabayar como montador a les órdenes de directores de la talla d’Agnès Varda, Truffaut o William Klein, Resnais decidió dar el saltu al llargumetraxe en 1959 con Hiroshima mon amour , película escrita por Marguerite Duras que’l críticu norteamericanu Leonard Maltin nun dulda en calificar como “la nacencia d’una nación de la Nouvelle Vague”. Dos años depués llegaría la non menos maxistral L’añu pasáu en Marienbad (1961), escrita nesta ocasión col padre del Nouveau Roman, Alain Robbe-Grillet, película misteriosa, llaberíntica y provocadora pola que recibió’l Lleón d’Oru de Venecia. En 1963 volvió a un cine más políticu con Muriel, onde abordaba ente otros l’espinosu tema de la tortura n’Arxelia, y en 1966 con La guerra acabó, con guión de Jorge Semprún. En 1967 participó na película colectiva Lloñe de Vietnam, en solidaridá col pueblu vietnamita. Trabayador incansable, la so sonadía siguiría aumentando nes décades siguientes con títulos tan importantes como Quiérote, quiérote (1968), Staviski (1973), Providence (1976), El mio tíu d’América (1980), La vida ye una novela (1983), Muerte al amor (1984), Mélo (1986), Smoking/Non Smoking (1993), o’l so gran éxitu de crítica y públicu, la encantadora On connait la Chanson (1997). La so última película, Querer, beber y cantar (2014), presentóse nel Festival de Berlín namás un mes primero de morrer. Tenía 91 años.
