Tipu de planu que pola so duración pue almitir una estructura narrativa completa de planteamientu-desenvolvimientu-clímax y desenllaz. Polo xeneral, garra delles escales dende primer planu a planu xeneral, caracterízase por desenvolvese cola cámara en movimientu y por una duración de dellos minutos, como’l planu inicial introductoriu de La ronda (1950) de Max Ophuls, de cuatro minutos y mediu, el de Sede de mal (Touch of Evil, 1958) d’Orson Welles, de trés minutos y mediu o’l tamién introductoriu de Gravity (2013) d’Alfonso Cuarón, de más de siete minutos. La sensación de realidá del planu secuencia ye tamién una de les característiques poles que forma parte del estilu de dellos directores.
L’aspiración del llargumetraxe nun únicu planu secuencia existe polo menos desque Alfred Hitchcock rueda en dellos planos secuencia xuntaos por cortes invisibles el thriller La soga
El cine naz con rellatos curtios en planu secuencia, como’l planu únicu de 50 segundos d’El regador regáu (L’arroseur arrosé, 1896), de los hermanos Lumière, primer filme de comedia y de ficción. L’aspiración del llargumetraxe nun únicu planu secuencia existe polo menos desque Alfred Hitchcock rueda en dellos planos secuencia xuntaos por cortes invisibles el thriller La soga (Rope, 1948). La revolución dixital fai posible esta voluntá con llargumetraxes rodaos nun solu planu secuencia como’l de L’arca rusa (Russkiykovcheg, 2002) d’Alexander Sokurov, de 95 minutos de duración, o’l de Birdman (Birdman or the Unexpected Virtue of Ignorance, 2014) d’Alejandro González Iñárritu, planu secuencia de cuasi dos hores con dellos trucaxes y con delles interrupciones por corte.
Dellos directores caracterícense pola so predilección pol planu secuencia, convirtiéndolu en parte del so estilu, como Andrei Tarkovsky, sobre manera na so última dómina, en films como Sacrificiu (Offret, 1985), Luis García Berlanga a partir de Plácido (1961), o Arturo Ripstein en tola so filmografía, con llargumetraxes como La cai de l’amargura (2016).
La ronda
La Ronde / La ronde | Max Ophüls, 1950, Francia
Como nos avisa yá dende’l so metacinematográficu prólogu esi narrador convertíu en demiúrxicu guía d’esti evocador rellatu circular basáu nuna obra de teatru d’Arthur Schnitzler, la ronda del amor, la rueda, los caballitos de la bona o mala fortuna amorosa, pue empezar, por exemplu, en Viena, na primavera de 1900. El soldáu Franz atópase con Leocadia, una prostituta, p’acabar empareyándose con una criada, que pasa a manes del señoritu Alfred que, al empar, tien un llíu con Emma, una muyer casada, que’l so home, el millonariu Charles, entretiénse con una modista que ta namorada del poeta Robert, amigu d’una gran actriz que’l so caprichu ye un mozu teniente de dragones...