Planu que se correspuende, dende un esquema de causa-efectu, col so inmediatu anterior. Polo xeneral aplícase nos diálogos ente dos personaxes y sigue la llamada llei de correspondencia: un planu inicial del personaxe A, con una angulación y un valor determinaos, correspuéndese col planu simétricu –o contraplanu- del personaxe B, con angulación y valor idénticos. Y siempre dientro de los parámetros de la llei de la exa: por exemplu, el personaxe A en primer planu mira a la derecha y como respuesta’l personaxe B, tamién en primer planu y con angulación simétrica, mira a la esquierda. Dientro del esquema de causa-efectu, considérase tamién contraplanu la respuesta a una mirada: el personaxe mira y el planu de réplica amuesa lo que ve (un paisaxe, un oxetu o bien, ensin falta de simetría, otru personaxe).
Una de les convenciones principales del audiovisual, presente en tolos xéneros, ye la del diálogu en planu-contraplanu
Una de les convenciones principales del audiovisual, presente en tolos xéneros, ye la del diálogu en planu-contraplanu, como pue vese en films mudos y falaos a lo llargo de la historia en films de tolos directores, dende David W. Griffith hasta Jean LucGodard, dende John Ford hasta Federico Fellini, Pedro Almodóvar o David Fincher. En Persona (1966) d’Ingmar Bergman, la quexa de la enfermera Alma a l’actriz Elisabeth sobre la falta de ciñu d’esta pa col so fíu vese primero sobre un planu de cuatro minutos de la cara d’Elisabeth escuchando y depués el contraplanu d’Alma falando, repitiéndose’l monólogu enteru.
Nishi (Takeshi Kitano) ye un policía violentu y impredicible qu’abandona la carrera como axente de la llei depués de qu’ún de los sos compañeros, Horibe (Ren Osugi), quede postráu nuna siella de ruedes tres d’una redada peraccidentada. A partir d’entós, Nishi va dedicase a pasar el tiempu curiando de la so muyer Miyuki (Kayoko Kishimoto), que carez una enfermedá terminal. Apuráu poles deudes que supón el tratamientu, Nishi va vese obligáu a pidir un empréstamu a la yakuza, teniendo qu’encarar la dificultá de volver les perres. Mentes Nishi y Miyuki entamen el que va ser el so últimu viaxe como pareya, Horibe va descubrir la pintura como vía d’escape pal so desesperu, dando pie a unas obres d’arte surrealistes de gran guapura que lu van facer escaecer los sos enclinos suicides.
Cuando escribo un guión tengo tola película na cabeza, asina que cuando empezamos a rodar, ruedo ensin más. Toi más interesáu nel procesu de montaxe, por eso suelo rodar bien apriesa. Ye posible que non siempre tenga abondos planos, pero lo que ye interesante ye la manera en que xuegues con ellos
Takeshi Kitano
(1947)
Hasta la so definitiva consagración como ún de los cineastes xaponeses más importantes de les últimes décades, l’actor, director, comediante, escritor, poeta, pintor y diseñador de videoxuegos Takeshi Kitano yera conocíu nel so país principalmente como personaxe televisivu y miembru del dúu cómicu Two Beat. Sicasí, ye la so faceta cinematográfica tan peculiar la que lu fixo conocíu nel restu del mundu, onde recibió’l sofitu unánime de la crítica a nivel internacional. Nacíu’l 18 de xineru de 1947 nel barriu d’Adachi de Tokio, Kitano foi a la Universidá de Meiji desque acabó la educación secundaria pa estudiar Inxeniería, carrera que terminó dexando. Los sos primeros pasos nel mundu del espectáculu diolos como comediante nun club nocherniegu onde empezó trabayando d’ascensorista. Kitano algamó l’éxitu nel so país nos años 70 como cómicu al formar pareya humorística con Kiyoshi Kaneko. Nesti periodu garró’l nome artísticu Beat Takeshi y convirtióse nuna celebridá televisiva gracies a la so enorme capacidá satírica y al so humor políticamente incorrecto, creando ente otros el programa de tanta sonadía Takeshi’s Castle, conocíu n’España como Humor Amarillo. Na década de los 80 Kitano debutó como actor na gran pantalla, siendo una de les sos películes más importantes d’esi periodu Feliz Navidá, Mr. Lawrence (Nagisha Oshima, 1983), cinta protagonizada por David Bowie. Seis años depués, Kitano llanzóse a la dirección sustituyendo a un enfermu Kinji Fukasakual frente d’una modesta película de yakuces llamada Violent Cop (1989), onde tamién asumiría’l papel principal. Tres d’aquel debú circunstancial llegaríen les cada vez más personales, desconcertantes, murnies y fascinantes Boiling Point (1990), A Scene at the Sea (1991), Sonatine (1993), Getting Any? (1994) y Kids Return (1996). En 1997 escribiría, dirixiría y protagonizaría la primera de les sos obres maestres, HANA-BI. Flores de fueu, drama criminal pol que sería gallardonáu col Lleón d’Oru nel Festival de Venecia. Convertíu yá nún de los directores contemporáneos más respetaos de la so xeneración, y ensin dexar de llau en nengún momentu la so carrera en paralelo como actor dientro y fuera del so país, Kitano siguiría collechando premios y prestixu con títulos como El branu de Kikujiro (1999), Brother (2000), Dolls (2002) o Zatoichi (2003), historia clásica de samuráis cola que ganaría d’esta vuelta un Lleón de Plata en Venecia. Cada vez más fellinianu y autorreferencial, la so filmografía perparticular foi completándose, ente otres, con obres tan atípiques, esperimentales y caprichoses como Takeshis’ (2005), Glory to the Filmmaker (2007) o Aquiles y la tortuga (2008). Depués de más de 30 años de carrera prolífica, Kitano sigue siendo güei una de les personalidaes más sobresalientes y emblemátiques de Xapón. Sigue participando en programes y especiales de televisión, pintando, poniendo clases puntuales na universidá y publicando noveles, colecciones de rellatos, ensayos y poesía.
