Movimientu físicu de cámara nel que se mueve a lo llargo del planu la posición de la so exa. El movimientu de la cámara pue realizase en cualquier dirección, anque polo xeneral cuando se fala de travelling suel ser p’alantre (avanti en voz italiana o in na inglesa), p’atrás (retro n’italianu, out n’inglés), de forma llateral o bien en círculu. El travelling tradicional llévase a cabu cola cámara enriba de raíles o bien a mano, anque’l primer movimientu de cámara en desplazamientu que se conoz ye’l del filme rodáu nuna góndola veneciana Panorama de la Gran Canal vista dende una embarcación (Panorama du Grand Canal vu d’un bateau, 1896) d’Alexandre Promio, operador de los Lumiere. Segundo de Chomón empecipia’l travel sobre ruedes y realiza esti movimientu de cámara con funciones narratives nos lentos desplazamientos del llargumetraxe Cabiria (1913) de Giovanni Pastrone, y nos travellings aéreos de Napoleón (Napoléon, 1927) d’Abel Gance. En 1976 el director de fotografía Garrett Brown inventa l’estabilizador “Steadicam”, qu’anidia la vibración del operador nel travelling cámara en mano, utilizándose pela primer vez n’Esta tierra ye la mio tierra (Bound for Glory, 1976) de Hal Ashby, y poco depués n’El resplandor (The shining, 1980) de Stanley Kubrick, nos paseos en triciclu del neñu Danny pelos corredores del hotel.
El travelling tradicional llévase a cabu cola cámara enriba de raíles o bien a mano, anque’l primer movimientu de cámara en desplazamientu que se conoz ye’l del filme rodáu nuna góndola veneciana en Panorama de la Gran Canal vista dende una embarcación
Dalgunos de los travellings más celebraos de la historia del cine son los del coronel Dax avanzando nes trincheres ente los soldaos de Senderos de gloria (Paths of Glory, 1957) de Stanley Kubrick, les caminates del protagonista sicópata asesín n’Angst (1983) de Gerald Karlg (con un sistema creáu pol operador Zbigniew Rybczynski que fai solidaria la cámara col actor), los virtuosos planos-secuencia cámara en mano de Mikhail Kalatózov tanto en Cuando pasen les cigüeñes (1957) como en Soi Cuba (1964), o l’avance de la pareya protagonista per corredores y cocines hasta llegar delantre del escenariu del local nocherniegu n’Ún de los nuestros (Godfellas, 1990) de Martin Scorsese.
Soi Cuba
Hai fósiles cinematográficos que son buscaos polos paleontólogos d’esti arte y fósiles cinematográficos que cenciellamente apaecen de manera milagrosa. Soi Cuba cúntase ente estos postreros, porque significó una ayalga tan inesperada como atopar un mamut siberianu calteníu debaxo del sable d’una isla tropicalJ. Hoberman
I am Cuba / Soi Cuba | Mikhail Kalatózov, 1964, Cuba/URSS
En 1959, col trunfu de la Revolución Cubana, les rellaciones ente la isla y la Unión Soviética taben nel máximu apoxéu. Nel marcu de la cooperación cultural soviético-cubana, diba coproducise en 1963 Soi Cuba, película dirixida por Mijail Kalatózov na que participó un ampliu equipu técnicu cubano-soviéticu encabezáu pol director de fotografía Serguéi Urusevski, el mesmu que trabayó con Kalatózov en Cuando pasen les cigüeñes (Palma d’Oru nel Festival de Cannes en 1958). Trátase d’un filme en cuatro episodios que traza la historia de Cuba dende enantes de la Revolución hasta la llucha na Sierra Maestra. Ente les histories, una narradora (representando “la voz de Cuba”) diz coses tales como "Soi Cuba, la Cuba de los casinos, pero tamién de la xente". La so maxistral puesta n’escena y el so montaxe na tradición del meyor cine soviéticu, tresformaron esti “rellatu caribeñu” nuna epopeya socialista orixinal que, paradóxicamente, nun foi demasiao bien recibida nin poles autoridaes soviétiques nin polos dirixentes cubanos del ICAIC, que la consideraron tremendamente estereotipada. Escaecida a lo llargo de décades, foi redescubierta y restaurada 30 años depués por cineastes norteamericanos como Francis Ford Coppola y Martin Scorsese. Kalatazov, que morrió en 1973, nun llegó a ver nunca l’homenaxe póstumu qu’éstos-y rindieron en 1993.
