Forma natural del montaxe pensada pa esconder tolos cortes del metraxe, de forma que l’espectador perciba’l filme cola máxima fluidez, como si tuviera rodáu en planu secuencia. El montaxe invisible, propiu del cine clásicu de cada dómina, habitual de tolos xéneros, ta n’oposición al “visible”, nel que se violen les normes de la gramática clásica buscando que les transiciones se manifiesten na percepción del espectador, les más de les veces con della agresividá visual.
Cuasi tolos films de mayor éxitu comercial, incluyendo los blockbusters, tán montaos según les regles del montaxe invisible, dende Marchó col vientu, hasta Avatar
L’aprendimientu del montaxe consiste en bona parte en saber facer invisible’l corte. Existen pa eso trés directrices: la narrativa (poner n’escena lo que pide la narración a cada poco), la cinética (cortar mentes un movimientu o bien, xusto primero de que se produza, empezar el planu en movimientu) y l’auditiva (facer acaballar el soníu percima del puntu de corte). El montaxe visible busca atentar contra la suavidá y fluidez del invisible, ye propiu del cine esperimental y atopa nes corrientes cinematográfiques nueves de los años sesenta un impulsu curiosu. Dalgunes de les ruptures aplicaes sobre’l montaxe invisible (como’l “jumpcut”) foron, col tiempu, incorporándose al montaxe convencional clásicu. Cuasi tolos films de mayor éxitu comercial, incluyendo los blockbusters, tán montaos según les regles del montaxe invisible, dende Marchó col vientu (Gone with the Wind, 1939), hasta Avatar (2009), pasando per Casablanca (1942), Tiburón (Jaws, 1975), La guerra de les galaxes (Star Wars, 1977), Parque Xurásicu (Jurassic Park, 1993) y Titanic (1997).
Lloquilandia
Hellzapoppin’ / Hellzapoppin | H. C. Potter, 1941, EE.XX.
La mesma cinta avisa yá dende los sos propios títulos de creitu: “Cualquier asemeyanza ente Lloquilandia y una película ye pura coincidencia”. Namás teniendo en cuenta esa alvertencia pue ún encarase con esti festival anárquicu del humor surrealista, el gag metallingüísticu, el caos argumental y l’abaruyamientu xenéricu, auténticu exerciciu de terrorismu cinematográficu n’estáu puru. Dende’l principiu sabémonos arrastraos por una película dientro d’otra película que, más qu’adaptar a la gran pantalla la comedia musical orixinal que’l dúu Ole Olsen y Chic Johnson interpretaba en Broadway, utiliza ésta como una sida ensin más pa dinamitar cuanta norma fílmica y tentación “realista” se-y ponga delantre. Asina, los sos protagonistes non solo saben que tán dientro d’una película, sinón qu’interactúen con determín caóticu col so proyeccionista torpón, col públicu asorao (a un espectador mándenlu derecho pa casa), colos sos propios compañeros de repartu, col so guionista debaláu, colos so productores tan conservadores y hasta con toos esos códigos de fierro que faen que los xéneros nun acaben centrifugaos confusamente unos contra otros. Mezcla esquiciada ente l’anarquía de los hermanos Marx, el slapstick más estrozón, los musicales de Busby Berkeley y los descubrimientos del cartoon entendíu a la manera deliriante de Tex Avery, Lloquilandia (sintomáticamente escrita por Nat Perry, el mesmu guionista de la irreductible Sopa de Gansu) parodia dende’l Ciudadanu Kane de Welles hasta los más canónicos westerns, pasando pel estrictu “Códigu Hays” o pela mesma bisarma de Frankenstein. Lóxicamente, equí l’argumentu ye lo de menos.
