Unidá principal de tresmisión d’información nel audiovisual que se xenera a partir de la conversión del guión lliterariu en guión técnicu, obtiénse nel rodaxe a partir d’una o de delles tomes (planu de rodaxe) y manifiéstase na so forma definitiva nel montaxe (planu de montaxe). La información que tresmite’l planu procede en mui bona parte del encuadre que va garrando nel tiempu. Asina, el planu suel axetivase siempre nel guión técnicu pa especificar la so tipoloxía, que va dende’l primer planu (close up, gros plan), onde suel predominar la emoción, hasta’l planu xeneral (longshot, plan général), onde la dominante ye la información espacial, heredando estos significantes del llinguaxe de la pintura.
Les categoríes principales son la de primer planu, planu mediu, planu americanu, planu de conxuntu y planu xeneral
La tipoloxía según l’encuadre ye amplia, anque les categoríes principales son la de primer planu, planu mediu, planu americanu, planu de conxuntu y planu xeneral. El principiu de La naranxa mecánica (A Clockwork Orange, 1971) de Stanley Kubrick, empieza con un primer planu del protagonista, Álex, mirando en tientes a cámara, que va abriéndose amodo hasta llegar a un planu xeneral del chigre lacteu atacáu de xente. La tipoloxía según el tiempu conduz dende’l planu subliminal, percurtiu, de la duración mínima d’un fotograma, hasta’l planu secuencia, que la so duración pue ser hasta la d’un rellatu audiovisual completu.
L’audiovisual empieza con planos xenerales nos films de William Dickson, nel planu xeneral de cuerpu enteru de trés ferreros en Blacksmith scene (1893) y nos reportaxes documentales de los hermanos Lumière, como La sortie des ouvriers des usines Lumière à Lyon Monplaisir (1895). A primeros del sieglu XX, el cine usa yá toles escales de planos. Con Abel Gance –La rueda (La roue, 1922)- y cineastes soviéticos como Dziga Vértov –L’home de la cámara (Cielovik s Kinoapparaton, 1929)- la duración del planu algama la so cota mínima.
L'home de la cámara
Man with a Movie Camera / L'homme à la caméra | Dziga Vértov, 1929, URSS
Siguiendo la estela de “sinfoníes urbanes” como’l Berlín, sinfonía d’una gran ciudá (1927) de Walter Ruttman, Dziga Vértov amuésanos nesti filme con tintes de documental metallingüísticu’l día a día de la bullindiega ciudá de San Petersburgo. Al traviés del so cámara, qu’actúa como’l mesmu güeyu, Vértov capta la esencia del escenariu, reflexando les rellaciones sociales de los ciudadanos al traviés d’un análisis estrictamente marxista. Como única trama, el director intenta captar la rutina d’un operador de cámara soviéticu que tien que filmar la ciudá desque amanez hasta que s’escuende’l sol. Cola complicidá del so hermanu, l’operador Mikhaïl Kaufman, Vértov, fiel a les sos teoríes, nun dexa nin un momentu que pueda suponese que dalgún d’esos retayos pueda paecer inventáu. Por eso, nel montaxe vertixinosu que reflexa la fascinación de Vértov pol constructivismu y el futurismu, introduz de contino imáxenes del operador, que cola so cámara ta filmando la realidá que lu arrodia, y inclusive de la montadora, que na sala d’edición encárgase de da-y sentíu a tou esi material.