Recursu narrativu pol que se vuelve al pasáu de forma suxetiva cuando se parte de l’alcordanza d’un personaxe, como en Rashomon (1950) d’Akira Kurosawa, o de forma oxetiva cuando s’arranca de les necesidaes del rellatu, como en Foraxíos (The Killers, 1946) de Robert Siodmak. Dellos rellatos empiecen con una secuencia llamativa que llueu se desvela como la consecuencia final d’un procesu, de forma que tres l’episodiu inicial produzse la vuelta atrás pa esplicar les causes, polo que’l global de la historia ye un flash-back. Asina asocede n’El crepúsculu de los dioses (Sunset Boulevard, 1950) de Billy Wilder, onde’l guionista asesináu apaez flotando na piscina d’una casona de Hollywood y la so voz n’off empieza a cuntar cómo asocedió too. O en Salvar al soldáu Ryan (Saving Private Ryan, 1998), nel qu’un veteranu de la segunda guerra mundial nun cementeriu recuerda un episodiu bélicu qu’empieza col desembarcu de Normandía.
Ún de los primeros flash-backs del audiovisual ye’l del filme Historia d’un crime (Histoire d’un crime, 1901) de Ferdinand Zecca, nel que l’asesín condergáu a muerte recuerda –al traviés d’unes imáxenes nel mesmu encuadre nel qu’apaez el personaxe- los incidentes de la so vida que lu llevaron hasta la so situación.
Anque’l flash-back ye un recursu habitual de cualquier rellatu audiovisual, ye más frecuente en diversos tipos de thriller
Anque’l flash-back ye un recursu habitual de cualquier rellatu audiovisual, ye más frecuente en diversos tipos de thriller, y nún d’ellos, el whodunit, ye cuasimente normativu: un crime inicial investígase p’alcontrar quién lu cometió, munchos sospechosos cunten les sos coartaes nos interrogatorios, empecipiando la socesión de vueltes al pasáu; un flash-back final establez la verdá de lo asocedío. Asina pue vese na mayoría de les adaptaciones d’obres d’Agatha Christie como Diez Negrinos (And then there were none, 1945) dirixida por René Clair. O en cualquiera de los episodios de series televisives como CSI, Maigret, Inspector Wallander o Sherlock.
El crepúsculu de los dioses
Sunset Boulevard / Boulevard du Crépuscule | Billy Wilder, 1950, EE.XX.
Narrada en flash-back a partir del puntu de vista d’un cadabre flotando nuna piscina, la película cunta la historia de Joe Gillis, un escritor y guionista de segunda fila que, acosáu polos sos acreedores, va abellugase de casualidá na casona de Norma Desmond, antigua estrella del cine mudu que vive fuera de la realidá acompañada namás pol so fiel criáu Max. A partir d’un alcuentru tan casual, l’actriz va pretender que Joe corrixa un guión qu’ella mesma escribió y qu’habría ser el so regresu trunfal a la industria de Hollywood.
