Tipu de transición consistente na desapaición progresiva d’una imaxe mentes se xenera otra que la sustituye. Al revés que la transición por corte, que polo xeneral quier pasar desapercibida, la intención del encadenáu ye la d’amosase al espectador pa xenerar un significáu, yá seya una vuelta al pasáu, una elipsis o una identificación o contraste de formes. Tamién puee nun significar nada concreto más allá de la ufierta de guapura. Inclusive n’última instancia si’l pasu d’un planu a otru contién dalguna incorrección, l’encadenáu ye una solución recomendable pa suavizar el mal efectu.
La historia del encadenáu –tamién llamáu “fundíu encadenáu” y “disolvencia”- empieza enantes del mesmu cine, porque nos espectáculos de llinterna máxica, como les fantasmagoríes o espectáculos de terror d’últimos del XVIII y primeros del XIX, fundíase la imaxe d’un primer proyector de llinterna de la que surdía una imaxe nueva dende’l segundu. La entrada nel cine del encadenáu vien de los primeros films de los cineastes pioneros, como Georges Méliès, sobre manera en dellos trucaxes. Adulces, l’encadenáu va sumando significaos, como signu de camín de tiempu hacia’l futuru o bien hacia’l pasáu, o bien transición hacia’l suañu o la realidá, como en Reve et realité (1901) de Ferdinand Zecca, nel qu’un home besa a una muyer guapa que, tres un encadenáu, lu rechaza.
La intención del encadenáu ye la d’amosase al espectador pa xenerar un significáu, yá seya una vuelta al pasáu, una elipsis o una identificación o contraste de formes
Na secuencia inicial de la muerte de Charles Foster Kane de Ciudadanu Kane (Citizen Kane, 1942), dirixida por Orson Welles, l’acercamientu al castiellu de Xanadú produzse con dellos encadenaos que caltienen toos ellos la lluz de la ventana del edificiu nel mesmu puntu del encuadre. El mediumetraxe La Jetée (1962) de Chris Marker, realizáu a partir de voz n’off, música y imáxenes ensin movimientu, utiliza l’encadenáu como forma principal de transición. Martin Scorsese usa una figura d’estilu propia al encadenar personaxes que s’averen andando dende’l fondu a primer términu, encurtiando asina’l tiempu de trayectoria, como pue vese en Taxi driver (1976) o Afterhours (1985).
Apocalypse now
Apocalypse Now / Apocalypse Now | Francis Ford Coppola, 1979, EE.XX.
Inspirada llibremente n’El corazón de les tiniebles de Joseph Conrad, la película cúntanos cómo, na guerra de Vietnam, y quiciabes alredor de 1969, l’atormentáu capitán del exércitu norteamericanu Benjamin L. Willard (Martin Sheen) recibe en Saigón un encargu directu de los sos superiores que-y va camudar radicalmente la vida: la misión, altamente secreta, consiste n’alcontrar y matar al coronel Kurtz (Marlon Brando), militar de trayectoria impecable que paez perder el xuiciu al abellugase nel corazón de Camboya xunto a una tribu de nativos Montagnard que lu adoren como a una deidá primitiva. Pa llogralo, Willard ha remontar el ríu Nung nuna patrullera de l’armada acompañáu namás por un puñáu de soldaos.
Si nun podemos esperimentar como los pioneros del cine, cómo vamos consiguir que’l cine evolucione, cómo van ser les películes de los nuestros nietos
Francis Ford Coppola
(1939)
Consideráu como ún de los directores más importantes y influyentes de tolos tiempos, el míticu Francis Ford Coppola, figura fundacional como poques del llamáu New Hollywood, nació en Detroit el 7 d’abril de 1939 dientro d’una familia d’emigrantes napolitanos. Fíu del compositor Carmine Coppola y de l’actriz Italia Pennino Coppola, a los nueve años contraxo la poliomielitis, lo que lu obligó a quedar en cama una temporada perllarga y a depender, na so primer adolescencia, de los cuidaos de los sos mayores. En graduándose na escuela de cine de la Universidá de Los Ánxeles, collaboró con Roger Corman en delles películes de terror, xera que compatibilizó colos sos primeros trabayos como director, que recibieron una respuesta tibia de públicu y crítica. En 1970 recibió’l primeru de los sos seis Oscars pol so trabayu como guionista en Patton (Franklin J. Chaffner). Ello motivó que la Paramount-y encargare’l guión y la dirección d’El padrín (1972). Gallardonáu con tres premios más de l’Academia, el filme arrasó en taquilla y entá güei ye un símbolu auténticu de lo meyor que dio de sí’l cine na década de los 70. Realizada por un Coppola que tenía namás 33 años d’edá, la adaptación shakesperiana que fixo de la novela de Mario Puzo demostraría la so gran madurez creativa como cineasta. Gracies a esta película, Francis Ford Coppola adquirió los medios económicos y el prestixu necesarios pa desenvolver y producir los sos propios filmes nel marcu de l’American Zoetrope, empresa qu’él mesmu fundó en 1971 y onde trabayaríen directores como Martin Scorsese y George Lucas. Antes d’embarcase lliteralmente na que ye ensin dulda la so obra maestra, la monumental Apocalypse Now (1979), Coppola volvería dar na diana con El padrín II (1974), vuelta a la saga de Puzo que remataría yá definitivamente en 1990 con El padrín III. El rodaxe en Filipines a lo llargo de más de dos años d’Apocalypse Now tuvo arrodiáu por toa clas d’infortunios, incluyíu un tifón que destruyó bona parte de los decoraos. El filme supunxo una esperiencia agotadora pa tol equipu: Coppola tuvo qu’hipotecar la so propia casa pa consiguir la financiación necesaria p’acabar el rodaxe, y Martin Sheen tuvo a puntu de morrer d’un ataque cardiacu. El pocu éxitu comercial d’esta indiscutible obra maestra (que’l mesmu director volvió remontar y llanzar al mercáu nel 2001 col títulu d’Apocalypse Now Redux), xuntao col fracasu rotundu de la so visionaria Corazonada (1982), supunxo’l fin de l’American Zoetrope, obligando a Coppola a rodar na década de los 80 películes de menos presupuestu pero igual de memorables, como Rebalbos (1983), La llei de la cai (1983) o Cotton Club (1984). L’éxitu sonáu en 1990 d’El padrín III dexólu volver embarcase en proyectos de mayor y más operísticu envergadura, como ye’l casu de la igualmente exitosa Drácula de Bram Stoker(1992). Tres d’ella llegaríen títulos abondo más convencionales y “alimenticios”, como Jack (1996) o Defensa llexítima (1997), dedicándose yá entráu’l mileniu nuevu y cuasi n’esclusiva a la producción de filmes ayenos (casu de los de la so propia fía, la más qu’interesante Sofía Coppola), al rodaxe puntual de proyectos propios de presupuestu baxísimu (como Tetro, de 2009, o Twixt, de 2011), y al so llabor como empresariu en campos de mano tan estremaos del cine como puedan selo’l de la industria del vinu o’l de la hostelería. Nel 2015 foi gallardonáu col premiu Princesa d’Asturies de les Artes.
