Oxetivu de distancia focal variable que dexa averar o alloñar la imaxe a voluntá ensin alteriar la posición de la cámara. El términu “zoom” procede del modelu creáu pol alemán Frank G. Back en 1959 pa cámares de 35 mm y popularízase a partir de los años sesenta, pero existen dellos precedentes históricos d’esti tipu d’oxetivu, ún d’ellos el del cineasta granadín José Valdelomar (1904-1982), que patenta en 1928 un oxetivu de focal variable coles mesmes característiques del “zoom” pa, según les sos propies palabres, “penetrar nel alma del ser humanu”.
El términu zoom procede del modelu creáu pol alemán Frank G. Back en 1959 pa cámares de 35 mm y popularízase a partir de los años sesenta
Nel principiu de Muerte en Venecia (Morte a Venezia, 1971), de Luchino Visconti, un zoom avera la imaxe de Gustav Aschenbach, el protagonista sentáu nel vaporetto, dende planu xeneral a planu mediu. La combinación de travelling y zoom, track-zoom o dolly-zoom (travelling p’alantre y zoom p’atrás o viceversa) da la sensación d’averase a daqué o a daquién que se caltien inmóvil mentes el fondu s’alloña de nós, o a la inversa, recursu que reflexa visiones alteriaes de la realidá, tal como s’utiliza pela primer vez en Vértigu (1958), d’Alfred Hitchcock, y depués nuna montonera d’ocasiones como’l videoclip Thriller (1983) de Michael Jackson, que dirixe John Landis. El llamáu crash zoom, normalmente productu d’un trucaxe, dexa averase o alloñase mui velozmente. Por exemplu, dende’l planu cenital de la ciudá de Berlín hasta a un teléfonu coloráu al principiu de Corri, Lola, corri (Lola rennt, 1998), de Tom Tykwer.
The Kubrick zoom
Incluye fragmentos de La Naranxa mecánica (A clockwork orange / Orange Mécanique, 1971), Barry Lyndon (1975), El resplandor (The Shining / Shining, 1980) y La chaqueta metálica (Full Metal Jackett, 1987).
Si pue ser escrito o pensao, pue ser filmao
Stanley Kubrick
(1928-1999)
Consideráu por munchos como ún de los cineastes más influyentes del sieglu XX, Kubrick destacó tanto pola so cuasi obsesiva precisión técnica como pola gran estilización y el marcáu simbolismu de les sos películes. Director, guionista y productor, Stanley Kubrick nació’l 26 de xunetu de 1928 en Nueva York. Mal estudiante de neñu, los sos padres intentaron animalu mandándolu a California pa vivir en Pasadena al llau del so tíu maternu, Martin Perverler, personaxe importante na so posterior carrera cinematográfica porque lu ayudó a financiar los sos primeros proyectos fílmicos. Los intereses principales de Stanley yeren el cine, la llectura, l’axedrez y la fotografía, afición que-y valió pa consiguir el so primer contratu profesional al trabayar pa la revista Look. Debutó como director cinematográficu con una partida de documentales rodaos a primeros de los años 50. El so primer trabayu de ficción foi Fear And Desire (1953), drama bélicu de presupuestu baxu al que siguiría la tamién menor El besu del asesín (1955), relatu noir de perclara inspiración pulp. La so primer gran película sería Atracu perfectu (1956), producción independiente claramente influyida pol cine de Fritz Lang, John Huston, Samuel Fuller y Akira Kurosawa. A partir d’esi momentu, toles sos cintes seríen consideraes auténtiques obres cumal de caún de los munchos xéneros que tocó: el cine bélicu con Senderos de gloria (1957), el péplum con Espartaco (1960), l’adaptación lliteraria con Lolita (1962), la sátira política con ¿Teléfonu coloráu? Volamos a Moscú (1964), la ciencia ficción con 2001: Una odisea del espaciu (1968), el drama de dómina con Barry Lyndon (1975) o’l terror con El resplandor (1980). La influencia escomanada del so legáu pue siguise rastrexando güei, formal, técnica y hasta conceptualmente, na obra de cineastes tan importantes como Steven Spielberg, Quentin Tarantino, Christopher Nolan, Wes Anderson, Darren Aronofsky, Gaspar Noé, los hermanos Coen, Paul Thomas Anderson o Jonathan Glazer.
