Encuadre

(Framing / Cadrage)

Selección de los elementos visuales que formen parte del planu. El perímetru qu’estrema’l formatu escoyíu de filmación, un rectángulu que pue ser d’anchor y altor diversu según la moda de cada dómina, y la óptica utilizada que xenera la escala dende primer planu a planu xeneral, marquen les llendes y la naturaleza del encuadre.

L’exerciciu d’encuadrar, o organizar visualmente, avera la cinematografía al trabayu compositivu del arte de la pintura, cola variante de que nel audiovisual l’encuadre pue variar a lo llargo’l tiempu y incorpora el soníu. La manera d’encuadrar forma parte del estilu de cada cineasta. Asina, nel material rodao en 1931 del proyectu inacabáu ¡Que viva México! del que surdieron los films Thunder over Mexico (1933) o Time in the Sun (1940), y años más tarde la versión montada y sonorizada por Grigori Alexandrov ¡Que viva México! (1979), pue reconocese al so autor orixinal, Sergei Eisenstein, pol estilu nel encuadre d’esti director soviéticu.

La manera d’encuadrar forma parte del estilu de cada cineasta

Otros llargumetraxes nos qu’una de les mayores ufiertes ta nun encuadre de voluntá pictórica son La marquesa d’O (Die Marquise von O, 1976) d’Eric Rohmer, que parte de la pintura romántica del sieglu XIX y de pintores como Johann Heinrich Füssli. Y El cocineru, el lladrón, la so muyer y el so amante (The Cook, the Thief, his Wife & her Lover, 1989) de Peter Greenaway, onde un cuadru de Franz Hals, Llacuada d’oficiales na compañía de San Xurde, cuelga del restaurante valiendo de decoráu de fondu y enmarcando delles escenes. N’otru orde de coses pue destacase’l filme Mommy (2014) de Xavier Dolan, pol so encuadre en formatu verticalizante, distintu al rectangular que predominó a lo llargo de la historia del cine.

Fellini Ocho y mediu

8½ / Huit et demi | Federico Fellini, 1963, Italia/Francia

Titulada Ocho y mediu por tratase de la película númberu ocho y mediu de la filmografía felliniana (el “mediu” correspondería a la suma de Axencia matrimonial y Les tentaciones del doctor Antonio, segmentos pertenecientes respectivamente a les episódiques Amor na ciudá [1953] y Boccaccio 70 [1962]), la cinta, engañosamente autobiográfica anque confesional dafechu, cunta n’onírica clave metafílmica los problemes que tien qu’encarar Guido Anselmi (Marcello Mastroianni), un director de cine prestixosu, trasuntu del propiu Fellini, que traviesa una crisis creativa fonda mentes s’atopa dándo-y vueltes a un proyectu que nun sabe mui bién cómo abordar. La presión exercida por tolos que lu arrodien (collaboradores, familiares y amigos) nun lu va ayudar precisamente a salir del ensimesmamientu nel que ta metíu, polo que va viaxar hasta un balneariu tranquilu pa pasar ellí una temporada en busca de la inspiración perdida. Reasitiáu nun enclave tan idílicu, Guido va pasar revista a los fechos más importantes de la so vida, centrándose sobre manera na alcordanza allucinada de toles muyeres a les que quixo.

Semeya de Federico Fellini
Falar de suaños ye como falar de películes, porque’l cine usa’l llinguaxe de los suaños: años puen pasar en segundos y pue saltase d’un sitiu a otru

Federico Fellini

(1920-1993)

Xeniu indiscutible del cine contemporaneu, Fellini pasó la mayor parte de la so infancia en Rimini, la so tantes veces recordada ciudá natal. Les sos primeres grandes aficiones, enantes de descubrir la so pasión pol cine, foron el dibuxu y la caricatura. En 1939, xunto a so madre y la so hermana, treslladóse a Roma cola intención de cursar estudios de derechu y xurisprudencia na Universidá de Roma, estudios que nunca acabó. Ellí garró della sonadía gracies a les viñetes y los cuentos por entregues que publicó na revista Marco Aurelio, sonadía que lu llevó a trabayar col cómicu Aldo Fabrizi como autor de gags pa los sos espectáculos de variedaes.

En 1940, tres d’un pasu curtiu pela radio, fixo la so primer incursión nel mundu del celuloide al participar, en calidá de guionista, na película ¡El pirata soi yo!, dirixida por Mario Mattoli. En 1944 conoció al neorrealista Roberto Rossellini, que se diba convertir nel so tutor y col que diba collaborar como guionista, ente otres, na mítica Roma, ciudá abierta (1945). En 1950 estrenóse como director, primero codirixendo con Alberto Lattuada Lluces de variedaes, y depués yá en solitario con El xeque blancu (1951), basada nuna idea de Michelangelo Antonioni.

Mentes se rodaba ésta, conocería a Nino Rota, el músicu xenial al que se diba vincular yá pa tola vida. Al otru añu ganó un Lleón de Plata na Mostra de Venecia por Los inútiles. En 1954 ganó’l so segundu Lleón de Plata amás d’un Oscar por La strada, el so primer filme de resonancia internacional y el verdaderu puntu d’inflexón de la so carrera camín d’una filmografía progresivamente alloñada del neorrealismu y cada vez más centrada nel so universu personal tan particular. Les sos siguientes películes recibieron toa clas de premios internacionales, como la Palma d’Oru de Cannes por La dolce vita (1960), cola que llogró un importante éxitu comercial y una reconocencia crítica entá mayor.

Ocho y mediu (1963) supondría l’empiezu de la yá definitivamente consolidada segunda etapa de la so carrera, marcada toa ella pola so fantasía exuberante, el so barroquismu y el so humor tirando a surrealista. A ella pertenecen xoyes fellinianes inolvidables como Giulietta de los espíritos (1965), Roma (1972), Amarcord (1973) o Y la nave va (1983). Anque la so dómina de madurez tuvo marcada pol so distanciamientu gradual de la crítica y pola so cada vez más menguada capacidá comercial, en 1993, poco primero de la so muerte, Federico Fellini recibiría’l so quintu Oscar pol conxuntu de la so carrera.