(Diegetic music and Non-diegetic music / Musique diégétique et musique extra diégétique)
La música nos audiovisuales ye “diexética” (procedente del vocablu griegu que significa “mundu ficticiu creyible”) cuando surde de la historia narrada y polo tanto pue ser xenerada o bien percibida polos personaxes. Ye “estradiexética” cuando ye ayena a la percepción de los personaxes de forma que ta pensada pa sorrayar la emoción qu’ha esperimentar l’espectador.
La música diexética forma parte natural de la narración dau’l so calter realista: un personaxe toca un intrumentu o bien oi la radio o cualquier reproductor. La música estradiexética, sicasí, acéptase dende una convención que’l cine herieda del teatru y en xeneral de la ficción convertida n’espectáculu
La música diexética forma parte natural de la narración dau’l so calter realista: un personaxe toca un intrumentu o bien oi la radio o cualquier reproductor. La música estradiexética, sicasí, acéptase dende una convención que’l cine herieda del teatru y en xeneral de la ficción convertida n’espectáculu. Nel audiovisual algama quiciabes más desarrollu qu’en cualquier otru arte porque s’estiende a tolos xéneros cinematográficos de ficción y non ficción, n’especial los dibuxos animaos, el cine de suspense, el fantásticu y el de terror, les películes d’acción, los melodrames (“melodrama” significa drama con música), los concursos y magacinos de televisión y inclusive los noticiarios nos que supuestamente s’informa de forma oxetiva ensin falta de buscar l’efectu emocional suplementariu que confier la música.
Polo xeneral la mayoría de filmes dende mediaos de la década de los años 30, depués de la llegada del cine sonoru, combinen música diexética y estradiexética. Sicasí, dellos cineastes como Robert Bresson –Pickpocket (1959)-, Eric Rohmer –Ma nuit chez Maud (1969)- o José Luis Guerín –En construcción (2001)- arrenuncien a la convención de la música estradiexética en beneficiu d’un mayor realismu o de la busca de poesía al traviés del silenciu o los efectos de soníu.
Casinu, de Scorsese
Casino / Casino | Federico Martin Scorsese, 1995, EE.UU.
Basada na historia real de Frank “Lefty” Rosenthal, Anthony Spilotro y Geri McGee, Casinu asítianos nel mundu convulsu de Las Vegas nos años setenta. Ellí va ser unviáu polos sos xefes Sam "Ace" Rothstein (Robert De Niro), apostador deportivu profesional vinculáu a la mafia y encargáu dende entós de dirixir el casinu Tangiers cola connivencia del senador Andy Stone. Cola so llicencia tovía en trámite, Sam conviértese nel xefe de facto del casinu, doblando les ganancies de forma cuasi inmediata p’allegría de los sos benefactores na solombra. Impresionaos pol so trabayu, éstos unvien a un amigu de la infancia de Sam, l’axustador de cuentes Nicholas "Nicky" Santoro (Joe Pesci), pa que los protexa a él y al negociu. “Nicky”, sicasí, conviértese más nuna incomodidá que nuna ayuda, y gracies al so temperamentu violentu consigue rápido que-y prohiban la entrada en tolos casinos de Las Vegas. “Nicky” decide actuar pola so cuenta y llama al restu de la so banda, que vien dende’l mediu oeste p’ayudar a executar robos de xoyes y asesinatos de los que siempre ye quién a salir impune a pesar de tar vixiláu de contino pol FBI. Les coses van complicase entá más pa Sam cuando se namore, case y tenga una fía con Ginger McKenna (Sharon Stone), una ambiciosa estafadora y moza d’alterne incapaz a poner orde na so más qu’inestable vida.
Les películes toquen los nuestros corazones, espierten la nuestra visión, y camuden la nuestra forma de ver les coses. Llévennos a otros sitios. Ábrennos les puertes y les mentes. Les películes son les alcordances de la nuestra vida. Tenemos que siguir con vida
Martin Scorsese
(1942)
Director, productor, guionista, actor ocasional, showrunner televisivu, historiador cinematográficu vocacional y cinéfilu impenitente, Scorsese nació en Queens, Nueva York, el 17 de payares de 1942. Fíu y nietu d’inmigrantes italianos, la so infancia trescurrió al llau de la so tan modesta como devota familia católica. El fechu de ser un rapazu asmáticu separtólu tempranamente de les actividaes propies d’un mozu de la so edá, faciendo por contra qu’apruciera nél la so, dende entós yá irrefrenable, pasión pol cine (tenía 11 años cuando dibuxó’l so primer storyboard). Anque de primeres estudió pa ordenase sacerdote, a la fin matriculóse na Universidá de Nueva York, llogrando la so llicenciatura na escuela de cine en 1964 y sacando un títulu de posgráu nesa mesma disciplina en 1966. Depués de realizar dellos curtiumetraxes de corte alternativu, y ensin dulda perinfluyíu poles corrientes fílmiques nueves qu’acabaríen revolucionando en pocos años la cada vez más anquilosada industria cinematográfica norteamericana, Scorsese rodaría en 1967 col so compañeru d’estudios Harvey Keitel el so primer llargumetraxe, ¿Quién pica a la mio puerta?, cinta que-y permitiría ser consideráu como ún más de los moviebrats, grupu al que daquella pertenecíen inconformistes cineastes como Francis Ford Coppola, Brian De Palma, George Lucas y Steven Spielberg. Depués de trabayar a primeros de los 70 pal productor de películes de serie B Roger Corman, Scorsese alíase con Robert De Niro pa filmar en 1973 la que sería la so primer obra realmente personal, la inda embrionaria Males cais. Scorsese veríase definitivamente catapultáu al estrellatu en 1976 con Taxi Driver, película de cultu por escelencia, escrita con Paul Schrader y protagonizada por De Niro, que-y reportaría la so primer Palma d’Oru nel Festival de Cannes y qu’encimentaría dende entós la so lleenda como ún de los directores más importantes de tolos tiempos. Tres un curtiu anque traumáticu periodu de fracasos personales y profesionales, Scorsese invertiría toles sos enerxíes na qu’él mesmu creyía que sería la so última película, la monumental Güe bravu (1980), pa munchos la so más indiscutible obra maestra. La película nun algamó nengún éxitu de públicu, pero volvió afitar a Scorsese nel podiu de los realizadores más poderosos y aventureros del panorama norteamericanu xusto nel momentu en que los estudios taben radicalizando les sos posiciones depués de los fracasos sonoros de los últimos proyectos d’autores como Michael Cimino o’l mesmu Coppola. Na década de los 80 encararía proyectos tan distintos y distantes ente ellos como puedan selo El rei de la comedia (1983), ¡Qué nueche! (1985), El color del dineru (1986) y La última tentación de Cristo (1988). Scorsese nun volvería llevantar cabeza hasta la estrena en 1990 de la estraordinaria Ún de los nuestros, considerada por munchos como la meyor película sobre la mafia enxamás rodada. Recuperáu’l so ganchu en taquilla, realizó ente otres el remake d’El cabu del mieu (1991), la suntuosa adaptación de La edá de la inocencia (1993), y la so nueva incursión nel cine de temática gangsteril, Casinu (1995). El cambéu de sieglu resultaría-y especialmente provechosu: llograría filmar por fin (al llau del so yá inseparable Leonardo DiCaprio) ún de los sos más preciaos proyectos, la mastodóntica Gangs of New York (2002), consiguiría un gran éxitu de taquilla con L’aviador (2004), sería honráu nel 2005 cola Lexón d’Honor francesa, y depués d’ocho nominaciones fallíes ganaría finalmente con Infiltraos (2006) esi Oscar al meyor director que tantes veces se-y escapare, gallardón que-y apurrieron los sos amigos Coppola, Lucas y Spielberg. El 17 de xineru del 2010 otorgáron-y el premiu honoríficu Cecil B. DeMille na edición d’esi añu de los Globos d’Oru pola so “contribución tan sobresaliente al campu del entretenimientu”. Nuna encuesta realizada pola revista Empire, Scorsese salió escoyíu como’l tercer meyor director de la Historia, per detrás namás de Spielberg y Hitchcock.
