(Pan or panning shot or panoramic shot / Panoramique)
Movimientu de la cámara sobre la so exa, horizontal o verticalmente. La panorámica ye quiciabes el primer movimientu de cámara en surdir na historia del llinguaxe cinematográficu, y les sos funciones nun variaron dende’l so orixe: describir l’espaciu o bien siguir a un personaxe o un oxetu en movimientu. A menudo asóciase al planu suxetivu cuando la panorámica respuende a la mirada d’un personaxe, como na secuencia de l’ampliación de les fotografíes de Blow Up (Deséu d’una mañana de branu) (Blow Up, 1966) de Michelangelo Antonioni, cuando’l fotógrafu observa con atención dende’l sofá y nel planu siguiente la cámara muévese en panorámica amosando les ampliaciones fotográfiques colgaes nes vigues de madera.
La panorámica ye quiciabes el primer movimientu de cámara en surdir na historia del llinguaxe cinematográficu, y les sos funciones nun variaron dende’l so orixe: describir l’espaciu o bien siguir a un personaxe o un oxetu en movimientu
Les panorámiques de descripción espacial suelen dase al principiu de los rellatos cinematográficos o bien al empezar les secuencies, pa ufiertar tola información al espectador sobre l’allugamientu onde se va desenvolver el rellatu, por exemplu en La ventana indiscreta (Rear Window, 1954), d’Alfred Hitchcock, que los sos trés minutos iniciales tán dedicaos a describir el patiu d’atrás del edificiu del protagonista, un fotógrafu, al traviés de delles panorámiques.
Una de les primeres panorámiques de la historia del cine pue vese n’Asaltu y robu a un tren (The Great Train Robbery, 1903), western d’Edwin S. Porter, cuando la cámara efectúa un siguimientu n’horizontal y escontra la esquierda de los bandoleros nel monte xubiendo a los sos caballos y fuxendo.
La ventana indiscreta
Rear Window / Fenêtre sur cour | Alfred Hitchcock, 1954, EE.UU.
Obligáu a guardar reposu absolutu desque ruempe la pierna nun accidente mui aparatosu, el fotógrafu de prensa L. B. Jefferies (James Stewart) sobrelleva como meyor pue’l so zarramientu aburríu otiando con unos prismáticos dende la ventana del so apartamentu lo qu’asocede nes viviendes d’enfrente. Por cuenta de una partida de circunstancies bien rares, y cola complicidá tanto de la so propia moza como de la so enfermera, empieza a sospechar d’un vecín que la so muyer paez que desapaeció.
Fádiame enforma cuando la xente critica los mios filmes por causa del so conteníu. Ye como si daquién que mirare una naturaleza muerta dixere: pregúntome si eses mazanes van ser dulces o agries. El cine ye primero de too forma
Alfred Hitchcock
(1899-1980)
A lo llargo d’una carrera que duró más de mediu sieglu, Hitchcock configuró un estilu cinematográficu distintivu y bien reconocible que lu llevaría a ser reconocíu como l’indiscutible “Magu del Suspense”. Consideráu como ún de los artistes más importantes y influyentes del Séptimu Arte, toles sos películes ensin escepción (53 en total), tanto les mudes como les sonores, y tanto les de la so etapa británica como les de la so entá más exitosa etapa estaunidense, siguen estelando a los cinéfilos de tol mundu. Innovador y esperimentador incansable, Hitchcock dedicóse en cuerpu y alma al so arte, llegando a crear maquetes y esbozos sofisticaos pa caúna de les sos escenes primero de filmales. Cuando en 1929 realizó’l so primer filme parcialmente sonoru, La rapaza de Londres, yá taba consideráu como ún de los principales directores de cine británicos. N’encadenando una serie d’éxitos como Asesinatu (1930), L’home que sabía demasiao (1934), Los 39 pasos (1935), Sabotaxe (1936) y Alarma nel espresu (1938), Hitchcock viaxó a Estaos Uníos pa probar suerte nos estudios de Hollywood, esperando d’esa manera llograr una mayor llibertá creativa y muncha más popularidá. La so primer película americana foi la oscarizada Rebeca (1940). En tierres estaunidenses Hitchcock realizaría más d’una película por añu, ritmu que namás aparó tres Psicosis (1960). Dalgunes de les sos películes clásiques d’esi periodu seríen La solombra d’una dulda (1943), Encadenaos (1946), Estraños nun tren (1951), La ventana indiscreta (1954), el remake de L’home que sabía demasiao (1956), Vértigu (1958), Cola muerte nos calcaños (1959) y Los páxaros (1963). En 1968, l’Academia d’Artes y Ciencies Cinematográfiques concedió-y el Memorial Irving G. Thalberg, en compensación pol terrible error de nun concede-y nunca un Oscar, a pesar de ser nomáu hasta en cinco ocasiones. Nel actu d’entrega’l director namás dio les gracies. Mentanto, n’Europa, la obra de Hitchcock convirtiérese yá en referencia y guía de toa una nueva xeneración de críticos y directores, ente los que destacaría’l cahierista Francois Truffaut. De les llargues charles ente dambos artistes surdiría un míticu llibru onde’l cineasta británicu diba reflexonar estensamente sobre la so vida, el cine en xeneral y la so obra en particular.
