Acción qu’asocede más allá de les llendes del encuadre y que namás pue percibila l’espectador al traviés del soníu, o bien imaxinala a partir del contestu narrativu.
Los efectos de suxerencia del fuera de campu suelen dotar de sentíu poéticu inclusive les secuencies más violentes
El poder de la suxerencia del fuera de campu úsase a menudo nel xéneru de terror. Por exemplu, en The Blair Witch Project (1999), con guión, dirección y montaxe de Daniel Myrick y Eduardo Sánchez, nunca se llega a ver nengún de los fenómenos amenazadores qu’enllenen la banda sonora. Los efectos de suxerencia del fuera de campu suelen dotar de sentíu poéticu inclusive les secuencies más violentes: en La mirada d’Ulises (To Vlemma Tou Odissea, 1995) de Theo Angelopoulos, un ametrallamientu de dellos personaxes produzse fuera de campu por causa de la borrina que namás dexa entever al protagonista. Nel planu final de L’escritor (The Ghost Writer, 2010), de Roman Polanski, infórmase del asesinatu del protagonista desque salió de campu al traviés d’un impactu na banda sonora que suxer un accidente de coche y del vuelu de los papeles que llevaba debaxo’l brazu, que vuelven adulces a entrar en campu a la fin del planu.
Códigu desconocíu
Code Unknown / Code inconnu: Récit incomplet de divers voyages | Michael Haneke, 2000, Francia/Alemaña/Rumanía
Un xestu desafortunáu d’un adolescente desencadena una socesión de fechos que rellacionen la vida de dellos personaxes de clas social y procedencia xeográfica distintes. Como decoráu, el París multicultural del final de la década de los 90. Como tresfondu, la Europa de les mil y una velocidaes. En primer planu, una sociedá esquizofrénica y fragmentada, onde conviven el luxu y la miseria, el refalfiu de les clases medies y el desesperu de los desheredaos. Haneke amuesa instantánees vitales de dellos personaxes que se crucien, topeten y inórense nuna metrópolis europea. Personaxes que nun saben cómo reaccionar cuando la violencia españa énte los sos güeyos, que compliquen la vida d’otros cuando intenten ayudar, que s’enfrenten con mieu a una soledá qu’ellos mesmos foron construyendo: como Anne (Juliete Binoche), una actriz acosada poles sos propies pantasmes dientro y fuera de la pantalla; o Georges, un fotógrafu de guerra incapaz a reinxertase na Europa civilizada; o Amadou, un profesor senegalés mozu que trabaya con neños sordomudos pero que se sabe prisioneru de la so rabia; o María, una inmigrante rumana que se ve obligada a pidir llimosna p’ayudar a los suyos.
Nun odio de nenguna manera el cine comercial. Ye perfectamente llícitu. Hai muncha xente que precisa evadise porque quiciabes traviesen situaciones personales difíciles. Pero eso nun tien nada que ver con una manifestación artística. Una manifestación artística ta obligada a encarate cola realidá
Michael Haneke
(1942)
Austriacu d’adopción, el director y guionista alemán Michael Haneke foi gallardonáu col Premiu Príncipe d’Asturies de les Artes nel añu 2013, gallardón que venía confirmar el caláu tan escomanáu de la so filmografía inmisericorde, que nun hai dulda de que ye una de les más polémiques, revesoses, radicales y llúcides de les últimes décades. Consideráu ún de los más prestixosos cineastes de vanguardia n’activo, les sos películes son, según les sos propies palabres, “mocaes en tola cara”. Fíu del director y actor Fritz Haneke y de l’actriz Beatrix von Degenschild, tres el divorciu de los sos padres Haneke pasó la infancia cola so familia materna nel campu, cerca de Wiener Neustadt, n’Austria. Encegoláu col cine dende bien pequeñu, y en fracasando nel so intentu d’ingresu na Escuela Max Reinhardt, Michael decidió cursar estudios de Filosofía, Psicoloxía y Interpretación na Universidá de Viena, dedicándose poco depués a la crítica de cine. A partir de 1967 pasa a la edición y la escritura de guiones nuna cadena televisiva del sur d’Alemaña, onde empecipia amás una actividá intensa como director teatral. El so debú cinematográficu vendría de la mano d’El séptimu continente (1989), drama familiar desolador basáu en fechos reales y primer película de la so triloxía respigante sobre la “glaciación emocional”, triloxía que completaría coles non menos impactantes El videu de Benny (1992) y 71 fragmentos d’una cronoloxía del azar (1994). La consagración internacional llegaría-y en 1997 con Funny Games (Xuegos prestosos), metallingüística cinta de cultu de la qu’él mesmu rodaría’l so miméticu remake norteamericanu nel 2007. Con La pianista (2001), adaptación perdura de la novela de la escritora austriaca Elfriede Jelinek, ganó’l Gran Premiu del Xuráu nel Festival de Cannes. Tres de la so daqué fallida El tiempu del llobu (2003), Haneke volvió trunfar nel mesmu certame llevando’l Premiu al Meyor Director con Caxé (Escondíu) (2005) y la Palma d’Oru dos veces, primero cola so nominada doblemente al Oscar La cinta blanca (2009), y más va poco cola tristísima Amor (2012). Dende’l 2002 exerce como profesor de dirección na Academia de Cine de Viena, centru onde intenta tresmitir los sos conocimientos fílmicos a los sos estudiantes, dando una importancia especial a la dirección d’actores.
