Tipu de planu qu’identifica’l puntu de vista de la cámara cola mirada del personaxe. Asina, l’espectador pue aumentar el grau d’empatía col personaxe al compartir lo qu’esti ta viendo. Na trayectoria de busca d’identificación del espectador col rellatu audiovisual, qu’orientó la mayoría de progresos nel campu del guion, dirección y montaxe, la incorporación del planu suxetivu, conocíu tamién como “cámara suxetiva” (subjective camera, caméra subjective), supón una de les meyores más relevantes.
La computadora HAL 9000 ve en planu suxetivu a los astronautes de la nave que viaxa a Xúpiter en 2001. Una odisea del espaciu, de Stanley Kubrick
Quiciabes el primer usu d’esti recursu del llinguaxe se diere nos curtiumetraxes As seen through a telescope (1900) y Grandma’s Reading Glass (1900) de George Albert Smith, nos qu’un personaxe mira valiéndose d’una lente o d’un telescopiu y nel planu siguiente amuésase lo que ve. El llargumetraxe de cine negru La dama del llagu (Lady in the lake, 1947) que dirixe Robert Montgomery y qu’adapta una novela de Raymond Chandler, ta rodáu namás en planos suxetivos. L’ordenador HAL 9000 ve en planu suxetivu a los astronautes de la nave que viaxa a Xúpiter en 2001. Una odisea del espaciu (2001: A Space Odissey, 1968) de Stanley Kubrick. El videoclip Smack my bitch up (1998), de The Prodigy, dirixíu por Jonas Akerlund, ta realizáu en planos suxetivos pa esconder la identidá del protagonista, que nun se revela hasta’l final, cuando se ve reflexáu nun espeyu.
Cloverfield
Cloverfield | Matt Reeves, 2008, EEUU
Cloverfield ye formal y aparentemente una película de xéneru fantásticu que presenta la destrucción d’una ciudá como Nueva York por un monstruu, nun sabemos si estraterrestre o de los fondos marinos. Como filme fantásticu, atópase na llinia d’otros clásicos d’esti xéneru, como Them! (La humanidá en peligru, Gordon Douglas, 1954), King Kong (Merian C. Cooper y Ernest B. Schoedsack, 1933), The Beast from 20000 Fathoms (El monstruu de tiempos remotos, Eugène Lourié, 1953) o Gojira (Godzilla, Ishiro Honda, 1954). Un grupu d’amigos camín de la trentena axúntase nel apartamentu d’ún d’ellos, Rob, pa da-y una fiesta sorpresa de despidida, porque se tresllada a trabayar a Xapón. A la fiesta asiste Beth, la ex-moza de Rob, y a pesar del recibimientu prestosu, adulces van dir surdiendo reproches ente ellos de la qu’avanza la reunión, provocando qu’ella cole anticipadamente y de sópitu. Nesto, produzse una esplosión, que marca l’apaición del monstruu. A partir d’esi momentu, Rob y los sos amigos van dir en busca de Beth, resalvando tolos peligros y riesgos producíos pol monstruu y otros animales teratolóxicos. Cloverfield, con estética televisiva post 11-S, ta narrada dafechu dende’l puntu de vista suxetivu, porque lo que vemos en tou momentu como película ye la grabación d’ellos mesmos por sí mesmos con una cámara doméstica dixital. Dicho d’otra manera, Cloverfiel ta narrada cuasi dafechu en planu suxetivu.
