Técnica fotográfica y cinematográfica de captación de la imaxe con nitidez diversa de los elementos fotografiaos: una fondura de campu pequeña concentra la nitidez nun únicu términu, mentes qu’una fondura de campu amplia dexa tener perfectamente enfocaos elementos y personaxes en primer términu, nel términu mediu y nel términu más lloñe de la cámara.
Los films con fondura de campu amplia, como Ciudadanu Kane (Citizen Kane, 1942) d’Orson Welles, favorecen planos de mayor duración porque l’acción repártese nos distintos términos perceptibles pal espectador. El vezu ye combinar dambes opciones, como asocede por exemplu en Brazil (1985), de Terry Gilliam, con escenes de fondura amplia, como la factoría escomanada de trabayadores col director en primer términu, y con fondura mínima n’escenes como les de los artefactos mecánicos en funcionamientu.
Los films con fondura de campu amplia favorecen planos de mayor duración porque l’acción repártese nos distintos términos perceptibles pal espectador
Dellos exemplos de secuencies de fondura de campu amplia son la pionera The musketeers of Pig Alley (1912), curtiumetraxe de David Wark Griffith de 17 minutos con delles escenes de gángsteres moviéndose dende primer términu a términos alloñaos; el desenllaz d’El tercer home (The Third Man, 1948) de Carol Reed, nel planu llargu final nel cementeriu col protagonista en primer términu y la moza avanzando dende’l fondu; o la entrada del personaxe de Sherif Ali en Lawrence de Arabia (Lawrence of Arabia, 1962) de David Lean, col protagonista Lawrence y el so guía Tafas inmóviles nel oasis en primer términu y allalantrones un puntu negru (Sherif Ali montáu nel so camellu) que se va averando adulces.
Qué difícil ye ser un Dios
Hard to be a God / Il est difficile d'être un dieu | Aleksey German, 2013, Rusia
Depués de 14 años d’una realización percomplicada, la última película del portentosu cineasta rusu Aleksey German vería finalmente la lluz de manera póstuma. Depués del fallecimientu del autor nel 2013, seríen la so muyer y el so fíu los encargaos de rematar la dilatada postproducción y el montaxe de soníu definitivos d’esta adaptación allucinada y hipnótica de la novela homónima de los hermanos Strugatsky. El llibru, un clásicu de la ciencia-ficción soviética que German llevaba intentando adaptar dende últimos de la década de los 60, cunta les desventures de Don Rumata, viaxeru interestelar d’una Tierra del futuru que trabaya como observador imparcial nun planeta onde los sos habitantes atópense allancaos nuna Edá Media bien asemeyada a la terrícola. Pa la so desesperación, Rumata nun pue intervenir na evolución natural d’Arkanar promoviendo una especie de Renacimientu que dexe atrás la era actual d’escuridá, sinón que tien que ser testigu impasible de les atrocidaes violentes y barbarismos medievales a los que se dediquen los sos inorantes y crueles conciudadanos. Siendo como lo ye un proyectu lliteralmente arrastráu a lo llargo de toa una vida, paez normal que la película llevare hasta la so máxima radicalización toes eses constantes del cine de German capaces a facer de la pantalla un retablu recargáu llaráu d’escenes escatolóxiques y caracterizaciones grotesques namás comparables al universu estéticu apocalípticu de pintores como Brueghel el Vieyu o El Bosco.